Uf dr Foto gseht er uus, wi dr Heinz Däpp. I Würklechkeit isch ärs ou, dr Outor vo de „Schnappschöss„, wos gäng wie mee gett.


Heinz Däpp, Satiiriker, wo gäng gueti Komedi macht z’Bärn em Spiegubeld bim Stadtwandrr

Wohne tuet de Hene Däpp ir Stadt Bärn. Ar Chramgass, grad obenar Dischteuzwangzonft. Zu Zitte vom Buebeberg Aedu esch das di vörnäämschti Gesellschaft gsi ir Stadt Bärn. Em gliiche Senn gillt das hütt ou för de Schnappschiesser.

Aer esch en Arischtokrat under de Journaleschte. Kei Prolet, u kei gwöhnleche Börger! Nei, vo Däpp, Heinz, müssti meer em eigentlich säge. Drom esch äer ou nöm eifach Grossrotsbrechterstatter. Deert hett är zwar gleehrt, met vill Gedold d’Aalige usem Vouch aaz’lose, d’Eigeheite vor Aessvoupee u Aesspee z’onderscheide, und z’gsee, dass Aeffdeepee u Grüeni nomal echli anders si im Kanton Bärn.

Mängisch escher aber fascht verzwiiflet wägem Leerlauf, wo der Senat vo Bärn schon sit sinner gröndig ghaa het. Im Innere esch er drum Satiiriker worde. Aer het aagfange, siner Gedankeblitze iizfaa u Schnappschöss uf e Papierschibe z’schiesse. Die wärde sit Jahre im „Regi“, wie d’Regionausendig vo Bärn – Friburg – Wallis z’Bärn heisst, am Friitig under däm Titel gsändet. Es eimaaligs Chonterbont vo Bärner Spezialitäte esch doderbi entstande.

Wemmer em Heinz Däpp zuelost, chunnts eim mängisch vor, er sigi gäng no eine vo de gnädige Herre von Bärn. Nei, kee Borgerpräsident! Eine vo de guete Sorte, müsst me dee no biifüege. Grad wil är sech gäng liebevoll mit de Untertane vo Radiobärn beschäftigt.

Am liebste peckt er sich eine, mängisch o eini, use, zitiert ne oder si mit em geistige Oug i sini Stube, u laat sech die sonderbare Erläbnis wos Bärnervouch het lo verzelle. U dee fasst är aus, wie seechs för ne Patrizier ghöört, i sine eigene Wort zäme. E rechtigi Gschicht macht er druus, eini wo sech guet lat la verzeue am Mikrophon im Radiostudio ar Schwarztorstrass.

Wenn de Däpp über sini Undertane brichtet, esch är nie bösartig. Kritisch aber scho! Das hät mit sim Auter z’tüe. Wie aui, wo 68 drebi gsi si, isch är emal e jugendleche Stürmi gsi. Hütt het das besseret. Mr esch augemein autersweis worde i siner Generation. „S’Kritische“ sig wichtig, seit dr Däpp aber gäng no, „dermit me chan underscheide zwösche fäähler, wo Mönsche mache, und Schwechine, wo sich hei.“ Uf die hets dr Hene Däpp bsonders abgeseh, will us eene entstöh d’Charaktereere wo us Odertaane Mönsche forme.

Ig chan echs säge: Es isch en Ehr en Bärn, wenn’s e Schnappschoss über eim git. Mänge Politiker und mängi Politikere planget sit Monete, dass er oder sii o emal dra chunnt. Das isch fascht eso wie nes Sigu ufem Briefcouvert. Me isch denn nöm einfach e Masseversand vor Schanzeposcht. Nei, me isch e sorgfäutig geschribeni Personenbeschriibig, wo med Bedacht gfautet u iipackt worde esch. Am Änd hets Couvär vom Meischter säuber dr schöni Stämpu übercho, womer siner Läbti uufbewahrt!

S’wichtigste ar Läbesgschicht, wo so düren Aether vo Radio Dee-Er-Ess geschickt werd, isch d’Schprach vom Heinz Däpp. Aus junge Journi het er wie aui uf Schrifttütsch geschrebe. I viune Ziitige vo angere Stett. Korreschpondänt isch är denn gsi. Bis är gmerkt het, dass das nume nes Hindernis esch, um ganz bide Lüt zsi.

Denn her är aagfange uf Bärndütsch z’schribe. U plötzlech isch är dr Seu vo de Bärner nöch cho. Obwou d’Kolturdiräktion vo Bärn pompösi Verehrige schücht wie de Muurer Ueli d’Aare, si em Däpp siner Schnappschös Kolt worde. U är esch es ou worde. Drom chan är sech itze o aues leischte: „Bim aute Tschäppät“, seit de Däpp, „het mer vor Eerfurcht ne Hünerhuut übercho. Bim itzige gits nume no Bibeli!“ U aues lacht, säubscht dr Alex. Dr Däppät esch haut die no hööcheri Outorität z’Bärn aus dr etzig Stadtpräsidänt.

Z’Züri und z’Basu hätti dr Heinz Däpp dadermint kei Erfoug. Weu siner Schnappschöss si u blibe e Teil vor Bärner Identität, seit dr Profässer Stadtwandrr. U wer sech mit dere usenander setzt, de oder die chunnt am Hene sine Bücher, wo genau gliich heisse aber gäng wie mee wärde, nid verbi.

„Ufem Foto gseni uss win e ufgestängelete Chopfsalat“, seit dr Däpp über sech säuber. Meeh vonem erfahrt me aber ned. Grad eso, wie wenn er nüüd Bsundrigs wäär, wome dröber chönt e Glosse schriibe. Villicht isch das a dem Wuchenändi angersch, wenn är sini Komedi im „La Cappella“ diräkt vor em stuunende Publikum zum Beschte gett.

Gööt, u loset dee Tuusigskärli vomene Bärner Dechter!

dr Stadtwandrr


Comments

2 Comments so far

  1. eigenmann eugen on Juni 18, 2009 05:16

    Liebe heinz 18.06.09

    Ha grad oeppis ghoert vom walter daepp u outomatisch a dii daenkt. So hani dini adraesse gsuecht i dr hoffnig ou ae e-mail adraesse zfinde. Im telefonbuech isch nuet zfinde gsii. So hani wiiter gsuecht u itz versueche ig mit dem churzbrief dii zerreiche. Mir koenne ues vo burdled haer. We de magsch gimer ae antwort.
    Haerzleaech gruesst , Eugen us Auroville In

  2. stadtwanderer on Juni 18, 2009 19:18

    also, heinz däpp, wohnt heute in bern. im zunfthaus zum diestelzwang, mitten in der altstadt.

Name (required)

Email (required)

Website

Speak your mind